Mar 6 | SBE | STEP | Yesu tenem tupwa ne ye laugabaei kabo ye uyoma yona magai Nasaleta unai maiyana hekahekatao.

Mark 6

Yesu Nasaleta unai se laukwatakwataei

(Mataiyo 13:53-58; Luka 4:16-30)

1 Yesu tenem tupwa ne ye laugabaei kabo ye uyoma yona magai Nasaleta unai maiyana hekahekatao. 2 Sabati mayadaina ye hekalo, na ye hetubu ye lauhekata sunago kalona wai. Boda maudoidi yona hedehedede se lapui ede se nokoei. Se henahenamai uyoidi se wane, “Tamowai ta haedi ginauli maudoidi ta ye kaipateidi yo sibasiba ta haedi ye hai? Idohagi na teina laulau gigigigibwalidi ta ye ginaulidi? 3 Iya meta kapenta. Yo hinage Maliya natuna, na kana kahao ede Yamesi, Yosepa, Yudasi yo Simona. Na lounao hinage maiyadao ta miyamiya.” Unai ede se laukwatakwataei. 4 Na Yesu ye hededelau udiyedi ye wane, “Magai maudoidi peloweta se hekasisiyei, na yona magai tamowaidi yo kana bogao yo kehanao nige se hekasisiyei.” 5 Ede magai wa unai nige gonowana laulau gigibwalina hesau ye ginauli, na nimana ye tolesae tamowai kasikasiyebwadi hisa mo udiyedi na se namwanamwa. 6 Yesu ye noko kalili, matawuwuna ede yona magai tamowaidi nige se sunumai.

Yesu Saudoudoi-labui ye hetamalidi

(Mataiyo 9:35 yo 10:1,5-15; Luka 9:1-6)

Na Yesu ye lau magai gagilidi udiyedi tamowai ye hekatadi.

7 Na kabo Saudoudoi-labui wa ye yoganeidi bena labui labui ye hetamalidi. Iya yona gigibwali ye moseidi unai kabo yaluwa yabayababadi se hedede hepesadi. 8 Na kabo ye guguyaidi ye wane, “Tabu ginauli hesau kwa laubahei yomi kabalau ne unai, na tuke mo. Tabu kami kai, yomi tobwa yo moni kwa bahebaheidi. 9 Na gonowana mo buti kwa likwadi, na tabu kami kwama hagahagadi kwa baheidi.” 10 Na ye hedede uyo ye wane, “Kaiteya numa unai se yoganeigomiu na kwa mwalaesae, meta unai kwa miya ye lau ee magai me kwa laugabaei. 11 Ena kaiteya magai nige se yogaisinigomiu, yo yomi hedehedede nige se lapuidi, meta kwa laugabaei na kaemiu nagalidi mo kwa koinihinihiyedi. ^{▼▼6:11Dius tamowaidi, ena se lau dagela tamowaidi yodi tano se laugabaedi, siya bena kadi buti yo kwama udiyedinagali se koinihinihi namwanamwaedi, matawuwuna se nuwatuidi meta dagela tamowaidi yo yodi tano se biki. Yesu yona hekahekatao ye hededelau udiyedi teina laulau kesekesegana ta bena se ginaginauli Dius tamowaidi Yaubada yona wasa se tolehesuwala udiyedi. Teina ye hemasalaha meta Yaubada ye nuwatuidi meta se biki doha dagela tamowaidiyao. Unai kabo ye hekamkamnadi, ena nige nuwadi se buidi.} Temeta ye hemala magai ne yodi hekihekinoi.” 12 Yesu yona hekahekatao wa se pesa se lau, se lauguguya bena tamowai nuwadi se buidi. 13 Yaluwa yabayababadi gwaudi se hedede hepesadi, na bunama unai taukasikasiyebwa gwaudi se heyausidi yo se henamwanamwadi.

Yowane Babatiso se unui wa wasana

(Mataiyo 14:1-12; Luka 9:7-9)

14 Heloda wasawasa Yesu wasana ye lapui, matawuwuna Yesu hesana wa tamowai maudoidi kabina se kata. Hekadi se wane, “Nuwana Yowane Babatiso iya boita unai ye tolouyoma, unai ede paisowa gigibwalidi ye hemasalahadi.” 15 Hekadi se wane, “Nuwana Eliya”, yo hekadi se wane, “Nuwana peloweta hesau, yo doha peloweta bagubagunadi wa hesau.” 16 Na huyana Heloda wasa wa ye lapui meta ye wane, “Yesu ede Yowane. Iya gadona ya boliyako, na boita unai ye tolouyoma.”

17 Mata wuwuna Heloda ye bom ye hededeyako unai Yowane se hai, se kau na se tole numa tutugudu unai. Yona ginaulina matawuwuna ede Helodiya. Helodiya meta Heloda yona saeya Pilipo mwanena, na Heloda ye tawasolai. 18 Unai Yowane ye hedehededelau Heloda unai, ye wane, “Kowa laugagayo ku utusi, taba tabu kam kaha mwanena ku tawatawasolai.” 19 Unai na Helodiya ye kouyalayala kalili, na ye henuwa bena Yowane ye unuhemwaloi. Na iyamo nige gonowana ye ginauli, 20 matawuwuna Heloda Yowane ye kitalobai meta tamowai dudulaina yo tamowai tabuna, unai ye hekasisi kaliliyei yo ye kitahetete namwanamwaei. Huya badobado Heloda Yowane yona hedehedede wa ye lapuidi meta nuwana ye haikabi, na iyamo ye henuwa kalili bena ye lapulapulau Yowane unai.

21 Nige bayaona kabo Helodiya yona nuwatu mayadaina wa ye lage. Heloda yona huya labasi unai henuwaisini ye ginauli maiyanao tamowai lakilakidi yo iyala babadadi yo Galili babadadi hekadiyo. 22 Helodiya natuna waihiu, iya kabo ye lau siya matadi wai ye sobu. Heloda yo kana taumanao nuwadi se namwa kalili, unai wasawasa wa ye hededelau wawaya waihiu wa unai, ye wane, “Kowa kam henuhenuwa saha? Kabo ya ginauli, yo kabo ya leyawa.” 23 Iya ye hededehesunuma ye wane, “Ginauli saha ku kaibwadai, kabo ya leyawa yom. Gonogonowana doha yogu basileiya ta tehana ena ku henuwa.” 24 Waihiu wa kabo ye lau sinana unai ye henamai, ye wane, “Saha kabo ya kaibwadai?” Helodiya ye wane, “Yowane Babatiso kulukuluna.” 25 Ede ye lau mwamwayau ye uyo wasawasa wa unai, ye kaibwadalau unai ye wane, “Yau yogu kaibwada mahana mo ta unai ede teina: Yowane Babatiso kulukuluna gaeba unai ku usaei na ku haiyama.” 26 Wasawasa wa nuwana ye yababa kalili, na nige saha hesau ye hedede, matawuwuna kana taumanao yona hedehedede hesunuma wa se lapuiyako. 27 Wasawasa wa taukaiunu hesau ye lauhelili ye wane, “Yowane kulukuluna ku baheiyama.” Iya kabo ye lau numa tutugudu unai, Yowane gadona ye boli utusi. 28 Na kulukuluna wa gaeba unai ye usaei ye baheiyama ye mosei waihiu wa unai. Na ye bahei ye laei sinana wa unai. 29 Huyana Yowane yona hekahekatao wasa se lapui kabo se laoma, tau gaibuna mo se bahei se laei bwayabwaya unai se tole.

Yesu tamowai 5000 ye hekaidi

(Mataiyo 14:13-21; Luka 9:10-17; Yowane 6:1-14)

30 Apostolo se lagegogoma Yesu unai, yodi paisowa yo yodi lauhekata wasadi yona se hedehedede. 31 Na tamowai se bado kalili se hemohemode, unai nige gonowana bena se kaikai. Ede Yesu ye wane, “Kwa laoma, kita ta bom ta lau teha hesau unai. Temenai kabo ta kaiyawasi huya kubwakubwa.”

32 Siya se bom waga unai se gelu se lau balabala hesau unai. 33 Yodi kabalau ne meta tamowai gwaudi se kitayako yo se kitalobaidiko. Unai magai maudoidi se laugabaedi na se heloi na se lage baguna Yesu yona kabalage wa unai. 34 Yesu kabo ye dunasae boda lakilaki ye kitadi, yo ye katekamkamnaedi, matawuwuna ede siya doha mamoe nige taukitahetetedi. Unai kabo ye hetubu ginauli maudoidi ye hekatadi. 35 Mahana ye talukeo, ede yona hekahekatao wa se lau iya unai na se wane, “Teina ta balabala, yo mahana ye lau kalili. 36 Gonowana taba ku hetamalidi se lau kasa gagilidi yo magai dedekadi udiyedi, kadi kai se lokune.” 37 Yesu ye hededelau udiyedi ye wane, “Komiu kadi kai kwa moseidi.” Siya kabo se henamaiyei se wane, “Haidi kabo denali 200 ^{▼▼6:37 Denali 200 meta tamowai kesega taba ye paisowa waikena badona haligigi-haiyona unai gonowana kabo tenem moni lakilakina ne ye lobai ye hemala maisana.} ka hai na kadi kai ka lokune yo ka hekaidi?” 38 Unai kabo ye wane, “Hage, kwa kita, pwalawa hisa kalimiu yena?” Apostolo kabo pwalawa se lobaidi, ede se uyoma iya unai na se wane, “Pwalawa haligigi yo yama labui.” 39 Iya ye hededelau udiyedi ye wane, “Maudoidi kwa hedede se tuligogoi lagau ne unai.” 40 Siya kabo se tuli namwanamwa, pwalu hekadi 100, yo pwalu hekadi 50. 41 Iya pwalawa haligigi ye haidi yo yama labui, ye kitasae galewa unai, Yaubada ye lautokiyei. Na kabo pwalawa ye kihi hegahegagili na ye moseidi yona hekahekatao kalidi wai. Siya kabo se soiyei tamowai wa kalidi wai. Na hinage yama labui ye kihi hegahegagili na ye moseidi maudoidi se kai. 42 Na maudoidi se kaikai yo bogadi se sese. 43 Yesu yona hekahekatao kaitole wa se tanogogoidi, meta bosa saudoudoi-labui se hemwayaudi. 44 Taukaikai badodi ede 5000.

Yesu Galili Gabwana kewana unai ye laulau

(Mataiyo 14:22-33; Luka 6:15-21)

45 Yesu yona hekahekatao ye hegelu mwamwayauyedi se kawasi baguna Betesaida, na kabo boda wa ye hetamalidi se lau. 46 Na kabo ye sae koya tupina hesau unai ye tapwalolo. 47 Boniyaina ne unai meta waga wa sola waila duwaduwalina unai ye laulau, na Yesu ye bom mo tano wa unai ye miyamiya. 48 Iya ye kitadi wose unai se kabikabi useidi, matawuwuna ede yaumai ye bayao yo hinage se wosematai. Malatomtom gagilina Galili Gabwana unai ye laulau udiyedi bena kabo ye laugabaedi. 49 Na se kita waila unai ye laulau, na yodi nuwatu bena kaiyabu. Ede se yogahi, 50 matawuwuna maudoidi iya se kita na se matausi kalili. Na ye hededelau udiyedi ye wane, “Nuwamiu se talu. Doha yau. Tabu kwa matausi!” 51 Na kabo ye gelusae waga wa unai maiyanao, na yaumai wa ye kaiyawasi. Siya kabo se noko kalili, 52 matawuwuna pwalawa haligigi laulauna wa nige se nuwatulobai, na nuwadi se kwailolo.

Genesaleta unai Yesu tamowai ye henamwadi

(Mataiyo 14:34-36)

53 Siya se duna Genesaleta unai, menai yodi waga se lowoni. 54 Huyana waga se pesagabaei, tamowai hekadi Yesu se kitalobai, 55 ede magai wa maudoina se tauhetakikili. Taukasikasiyebwa se baheidi diyadiyali udiyedi, na se laedi haedi wasana se lapui wa unai. 56 Yesu haedi yona kabalau ne udiyedi — magai gagilidi o magai lakilakidi udiyedi — tamowai kasikasiyebwadi se bahelaedi yodi kaba koikoigogo udiyedi. Na se kaibwadai bena kana kwama dedekana wai se kabilau, na siya kaiteyadi se kabilau unai wa kabo se namwanamwa.